Imsiebaħ – 2015 – 9 – Settembru
[spiderpowa-pdf src=”https://birkirkara-sm.knisja.mt/wp-content/uploads/2015/08/Imsiebah-Settembru-2015.pdf”]
Awwissu 2015
Fil-Verġni Marija mtellgħa s-sema bir-ruħ u l-ġisem, nilmħu lil Alla ilibbes lill-bniedem b’dik is-sbuħija li biha kien żejnu fil-ġnien tal-Għeden. Il-festa tal-Assunta għandha messaġġ qawwi li jgħin lill-bniedem jagħraf li hu maħluq xbieha ta’ Alla. Meta Ommna Marija telgħet fis-sema bir-ruħ u l-ġisem, fil-persuna ta’ Marija t-Trinità Qaddisa kienet qed tilqa’ lill-bniedem sħiħ u lil kull bniedem. Għax Alla ħalaq il-bniedem “xbieha tiegħu” biex jgħix għal dejjem. Bil-qawwa ta’ Kristu Feddej il-bniedem jista’ jipparteċipa minn din ir-rebħa assoluta fuq il-mewt u jgħix għal dejjem.
Jekk Alla huwa sabiħ, il-bniedem maħluq xbieha tiegħu suppost jirrifletti dak il-ġmiel ta’ Alla u dik l-armonija li hemm f’Alla. Imma l-bniedem fid-dgħufija tiegħu jirribella kontra Alla u jitfa’ wara spallejh dak il-ġmiel biex ixidd libsa oħra: natura umana mwaqqgħa fid-dnub. Ta’ spiss, il-bniedem jagħżel illi jmur kontra l-proġett u r-rieda ta’ Alla.
L-esperjenza rrakkontata fil-Ġenesi mhix esperjeza limitata għal Adam u Eva biss. Tista’ tkun l-esperjenza tagħna lkoll. Il-libertà li żejjinna biha Alla nistgħu nużawha ħażin. Nistgħu nirribellaw kontra l-ħsieb u l-proġetti ta’ Alla. Jekk nagħmlu din l-għażla, inkunu qegħdin ninżgħu l-ġmiel u niċċappsu bit-tebgħa tad-dnub. Id-dnub huwa kull kruha li hemm fil-ħajja individwali, fil-ħajja tal-familja, fil-ħajja soċjali u fil-ħajja tal-Knisja.
Fl-Għeden il-bniedem mhux biss neża’ l-ġmiel li libbsu Alla, imma neżża’ wkoll lil ħutu l-bnedmin. Kajjin neħħa l-ħajja ta’ ħuh Abel u għamel ġerħa lill-familja tiegħu. Il-ġmiel jirrifletti ruħu meta hemm ħajja komunitarja, meta hemm l-għaqda bejn l-aħwa. Meta l-ispirtu komunitarju fil-ħajja soċjali, familjari u fil-ħajja tal-komunità nisranija jkun imkisser, dan ikun ta’ dannu serju hafna, għaliex inkunu qegħdin intebbgħu l-ġmiel tal-poplu ta’ Alla – inkunu qegħdin ninżgħu minn dan is-sebħ ta’ Alla li jidher b’mod qawwi fl-Assunta.
Nixtieq nieħu l-okkażjoni tal-festa tagħna biex minn qalbi nirringrazzja lis-saċerdoti li jagħtu s-servizz tagħhom fil-parroċċa tagħna. Irrid ngħid grazzi kbira lil dawk kollha li, min f’qasam u min f’ieħor, jgħinuna fil-ħidma pastorali. Għandna wkoll persuni, fosthom ħafna anzjani u morda, li jitolbu kuljum għall-komunità tagħna u għall-ħidma li titwettaq fil-parroċċa. Anke lil dawn nixtieq ngħidilhom grazzi minn qalbi u nwegħidhom it-talb tiegħi.
Irrid nirringrazzja ħafna lil dawk kollha li jagħtu xi servizz fil-knisja jew fil-gruppi u l-kummissjonijiet tagħna. Grazzi wkoll lil dawk li jgħinu l-komunità tagħna billi jagħmlu xogħlijiet ta’ siwi kbir is-sena kollha. Grazzi lill-benefatturi kollha. Minn qalbi nixtieq festa ta’ ferħ u paċi lil kulħadd. Ġesù jbierek lilkom u l-familji tagħkom.
Programm tal-Festa – 2015
[spiderpowa-pdf src=”https://birkirkara-sm.knisja.mt/wp-content/uploads/2015/07/Ktejjeb-Festa-Santa-Marija-2015-1.pdf”]
Il-Ġublew tal-Ħniena: 8 ta’ Diċembru 2015 – 20 ta’ Novembru 2016
Fit-13 ta’ Marzu li għadda f’omelija li għamel waqt ċelebrazzjoni fil-Bażilika ta’ San Pietru fil-Vatikan, il-Papa Franġisku ħabbar Ġublew Straordinarju ta’ Ħniena. Din ser tkun sena speċjali li tiftaħ fit-8 ta’ Diċembru ta’ din is-sena, li minbarra li tkun il-festa tal-Immakulata, dakinhar jaħbat ukoll il-50 anniversarju mill-għeluq tal-Koncilju Ekumeniku Vatikan II. Il-Ġublew jagħlaq fl-20 ta’ Novembru 2016, Festa ta’ Kristu Sultan tal-Ħolqien kollu.
Kif imfisser fid-dokument Misericordiae Vultus, ippublikat fil-11 t’April, Ġesu huwa wiċċ il-ħniena ta’ Alla l-Missier u l-misteru tal-fidi nisranija jsib fil-kelma “ħniena” il-ġabra sħiħa tiegħu. Il-Papa ried li l-motto għal din is-sena ta’ grazzja speċjali jkun “Ħanina bħall-Missier”. Il-kliem “Ħanina bħall-Missier” iwassalna għall-għan aħħari ta’ dan il-Ġublew: wara li aħna nkunu lqajna l-ħniena tal-Missier, imbagħad inkunu lesti li ngħadduha lill-oħrajn.
Il-logo ta’ dan il-Ġublew juri l-figura ta’ Ġesu, li bħala r-Ragħaj it-Tajjeb, qed iġorr fuq spallejh lill-bniedem mitluf, raffigurat fil-persuna ta’ Adam. Ta’ min jinnota kif l-għajn ix-xellugija ta’ Adam hija mwaħħda fl-għajn il-leminija ta’ Ġesu. Dan jurina li bil-ħniena ta’ Alla, Ġesu u l-bniedem għandhom l-istess viżjoni.
Minbarra li jħabbar u jagħti tagħrif dwar il-Ġublew tal-Ħniena, id-dokument Misericordiae Vultus jagħtina wkoll ġabra ta’ tagħlim dwar il-ħniena. Sa mill-bidu tal-pontifikat tiegħu, il-Papa Franġisku wera li din it-tema kienet ser tkun fiċ-ċentru tal-ministeru tiegħu bħala mexxej tal-Knisja Universali. Fil-prietki u fid-diskorsi tiegħu huwa kontinwament jisħaq fuq il-ħniena infinita ta’ Alla. Alla ma jegħja qatt jaħfrilna u għalhekk aħna ma għandna qatt naqtgħu qalbna mill-maħfra tiegħu. Mill-banda l-oħra, konsegwenza ċara ta’ dan it-tagħlim hija li aħna rridu nkunu egħjun li permezz tagħhom titwassal il-ħniena ta’ Alla lill-bnedmin kollha.
Il-ħniena ta’ Alla hija universali u l-Ġublew tal-Ħniena jrid imiss kull qasam tal-Knisja, irid jolqot il-qalb ta’ kull min huwa mgħammed. Imma m’għandux jieqaf biss fuqna l-insara, iżda jrid ikun miftuħ għall-bnedmin kollha ta’ rieda tajba. Il-Ħniena ta’ Alla hija għall-bnedmin kollha.
Wiċċ il-Ħniena (Misericordiae Vultus)
Wiċċ il-Ħniena (Misericordiae Vultus)
Bolla tal-Indizzjoni mill-Papa Franġisku dwar il-Ġublew Straordinarju tal-Ħniena
Ħsibijiet u Temi Prinċipali, u Analiżi
Il-Bolla Misericordiae Vultus ta’ Papa Franġisku tinftiehem tajjeb fil-qafas tal-Pontifikat tiegħu, jiġifieri fid-dawl tal-linji-gwida pastorali li hu ilu jisħaq fuqhom mill-bidunett tal-missjoni tiegħu bħala l-Isqof ta’ Ruma u Ragħaj tal-Knisja Universali. Mir-riflessjoni tiegħu qabel l-ewwel talba tal-Angelus tal-Pontifikat tiegħu (nhar is-17 ta’ Marzu 2013), beda jidher ċar li waħda mit-temi li kienu se jispikkaw fid-diskorsi u fil-ġesti tal-Papa l-ġdid kienet l-emfasi li hu beda jagħmel kostantement fuq il-ħniena ta’ Alla.
Nhar il-Ġimgha 13 ta’ Marzu 2015, meta waqt ċelebrazzjoni penitenzjali fil-Bażilika ta’ San Pietru, il-Papa ħabbar għall-ewwel darba l-Ġublew tal-Ħniena, u qal hekk: “Għeżież ħuti, spiss ħsibt fuq kif il-Knisja tista’ tagħmel iżjed evidenti l-missjoni tagħha ta’ xhud tal-ħniena. Hi mixja li titlaq minn konverżjoni spiritwali; u jeħtieġ nagħmluha din il-mixja. Għalhekk iddeċidejt li nsejjaħ Ġublew straordinarju li jkollu fil-qalba tiegħu l-ħniena ta’ Alla. Sa tkun Sena Mqaddsa tal-Ħniena. Irridu ngħixuha fid-dawl tal-kelma ta’ Alla. “Ħennu, bħalma hu ħanin Missierkom” (ara Lq 6:36). U dan ngħidu b’mod speċjali għall-konfessuri! Ħafna ħniena!
“Jiena konvint li l-Knisja kollha, li tant għandha bżonn tirċievi l-ħniena, għax aħna midinbin, tista’ ssib f’dan il-Ġublew il-ferħ li tiskopri mill-ġdid u tkattar il-ħniena ta’ Alla, li biha aħna lkoll imsejħa nfarrġu lil kull raġel u mara ta’ żmienna. Ma ninsewx li Alla kollox jaħfer, u Alla dejjem jaħfer. Ma negħjewx nitolbu maħfra”.
Il-Bolla Misericordiae Vultus, mhux biss tħabbar uffiċjalment il-Ġublew Straordinarju tal-Ħniena (mit-8 ta’ Diċembru 2015 sal-20 ta’ Novembru 2016) u tagħti xi dettalji preliminari dwaru, imma tagħtina ġabra straordinarja fil-qosor tat-teoloġija tal-ħniena. Huwa tagħlim li, bħalma hu kull tagħlim ieħor ġej minn Papa Franġisku, jista’ jinftiehem minn kulħadd, hi x’inhi l-formazzjoni jew il-livell edukattiv tiegħu. Il-kliem tad-dokument huwa mill-aktar ċar, l-istil mexxej, u għalhekk faċli li wieħed jaqbad it-test ta’ Misericordiae Vultus u jaqrah b’ċerta faċilità, anke bl-ilsien tagħna (kif miġjub mis-sit Laikos.org.mt). Id-dokument fih xi referenzi bibliċi sbieħ li jkomplu jgħinuna nifhmu s-suġġett, kif ukoll xi referenzi għal dak li kitbu xi ftit qaddisin (bħal Santu Wistin, San Tumas d’Akwinu u San Ġwann tas-Salib), kif ukoll numru ta’ Papiet riċenti (San Ġwanni XXIII, Beatu Pawlu VI u San Ġwanni Pawlu II). Naturalment, il-focus tad-dokument kollu hi l-ħniena infinita u permanenti ta’ Alla li jaf biss jurina tenerezza u għożża, u joffrilna l-maħfra tiegħu. L-istedina hija li ngħixu intensament dan il-Ġublew: “Ngħixu intensament il-Ġublew billi nitolbu lill-Missier il-maħfra ta’ dnubietna” (MV 22).
Kemm l-Introduzzjoni, kif ukoll il-Konklużjoni ta’ Misericordiae Vultus jagħtuna – kif wieħed jistenna – l-għan u l-ispirtu tal-Ġublew li se nkunu qed niċċelebraw. Fil-bidunett, Papa Franġisku jistqarr: “Ġesù Kristu hu wiċċ il-ħniena tal-Missier. Il-misteru tal-fidi Nisranija donnu jsib f’din il-kelma l-ġabra sħiħa tiegħu. Hi saret ħajja, viżibbli u laħqet il-quċċata tagħha f’Ġesù ta’ Nazaret. … Ġesù ta’ Nazaret bil-kelma tiegħu, bil-ġesti tiegħu u bil-persuna sħiħa tiegħu juri l-ħniena ta’ Alla” (MV 1). Fil-konklużjoni, il-Papa jgħid li waqt il-Ġublew “il-Knisja ssir eku tal-Kelma ta’ Alla li tidwi qawwija u konvinċenti bħala kelma u ġest ta’ maħfra, ta’ tweżin, ta’ għajnuna, ta’ mħabba. Ma tegħja qatt toffri l-ħniena u tistabar dejjem fil-faraġ u l-maħfra li xxerred” (MV 25).
Meta wieħed jaqra tajjeb Misericordiae Vultus, jintebaħ li hemm qafas bibliku sod, b’referenzi pertinenti ħafna għat-teoloġija tal-ħniena. Hemm referenzi għat-Testment il-Qadim, partikolarment xi Salmi u xi Profeti, u għat-Testment il-Ġdid, partikolarment għal xi parabboli u mirakli ta’ Ġesù. Aspett ieħor li joħroġ ċar fil-Bolla Pontifiċja huwa dak prattiku. Fi kliem ieħor, il-Papa jurina kif nagħmlu esperjenza personali tal-ħniena, u kif aħna ngħixu l-ħniena fir-relazzjonijiet tagħna ma’ ħutna l-bnedmin.
Fid-dokument Misericordiae Vultus jiena nara dawn l-aspetti trasversali:
(a) Aspett Kristoloġiku – b’emfasi fuq il-missjoni pubblika (speċjalment kif kien jilqa’ l-midinbin) u l-Misteru tal-Għid tal-Mulej. Aħna mistednin insammru ħarsitna fuq Ġesù. Ir-referenzi għal Ġesù huma ħafna u nsibuhom f’dawn il-paragrafi: 1, 7, 8, 11, 12, 14, 15, 20, 21, 22 u 25.
(b) Aspett Ekkleżjoloġiku – b’emfasi fuq il-Knisja li “għandha l-missjoni li xxandar il-ħniena ta’ Alla, il-qalb tħabbat tal-Evanġelu, li permezz tagħha trid tilħaq il-qalb u l-moħħ ta’ kull bniedem” (MV 12). F’rabta mal-aspett ekkleżjoloġiku, hemm dak eskatoloġiku, speċjalment bir-referenza għax-xirka tal-qaddisin (ara para. 22).
(c) Aspett Liturġiku – b’emfasi fuq iċ-ċelebrazzjoni tas-Sagrament tal-Qrar bħala esperjenza qawwija u diretta tal-ħniena ta’ Alla. Il-Papa qed jipproponi diversi inizjattivi bħal “24 siegħa għall-Mulej” biex il-Ġimgħa u s-Sibt tat-tielet ġimgħa tar-Randan ikun hemm konfessuri biex jisimgħu l-qrar f’diversi ċentri tad-djoċesijiet (ara MV 17), u bħall-Missjunarji tal-Ħniena matul ir-Randan li hu se jagħtihom l-awtorità li jaħfru anke d-dnubiet riżervati għas-Santa Sede, apparti milli jkunu “sinjal ħaj ta’ kif il-Missier jilqa’ lil dawk li qed ifittxu l-maħfra tiegħu” (MV 18).
(d) Aspett Marjoloġiku – b’emfasi fuq il-preżenza ta’ Marija li twassal il-bnedmin għar-rikonċiljazzjoni ma’ Binha Ġesù. Apparti l-fatt li l-Ġublew se jibda nhar it-8 ta’ Diċembru 2015, is-Solennità tat-Tnissil bla Tebgħa ta’ Marija, wieħed għandu jinnota li l-Papa jsejjaħ lil Marija bħala “Omm il-Ħniena”. Il-Papa jistqarr li “il-ħlewwa ta’ ħarsitha sseħibna tul din is-Sena Mqaddsa, biex ilkoll kemm aħna nistgħu niskopru mill-ġdid il-ferħ tal-ħlewwa ta’ Alla. Ħadd daqs Marija ma għaraf il-qawwa tal-misteru ta’ Alla magħmul bniedem. … Omm il-Mislub Irxoxt daħlet fis-santwarju tal-ħniena divina għax ħadet sehem intimu fil-misteru ta’ mħabbtu” (MV 24).
(e) Aspett Etiku – b’emfasi fuq ir-responsabbiltà fil-ħajja tan-Nisrani biex “ħadd minna ma … jsir imħallef ta’ ħuh” (MV 14). Papa Franġisku jfakkarna fis-sejħa li ngħixu b’libertà fil-konfront mal-illużjoni tal-flus (MV 19a), li ma nappoġġjawx jew inkunu kompliċi fil-korruzzjoni li theżżeż il-pedamenti tas-soċjetà (MV 19b), u li ngħixu l-valur tal-ġustizzja fir-relazzjoni ma’ ħutna l-bnedmin (MV 20).
Kif wieħed jistenna hemm diversi temi oħra direttament marbutin maċ-ċelebrazzjoni tal-Ġublew tal-Ħniena. Fost dawn, il-Bolla Misericordiae Vultus ssemmi: (i) is-sinifikat tal-“Bieb tal-Ħniena” (Porta Santa) (ara MV 3) li ma jkunx biss fil-Bażilika ta’ San Pietru fil-Vatikan u fil-Bażiliċi Patrijarkali ta’ Ruma, imma wkoll f’kull Djoċesi (bħal fil-Katidral, fis-Santwarji u postijiet oħra ta’ devozzjoni); (ii) il-motto tal-Ġublew – “Ħanina bħall-Missier” (MV 14); (iii) it-tema tal-vjaġġ jew pellegrinaġġ, li apparti l-aspett fiżiku li spiss jieħu, għandu jkun simbolu tal-vjaġġ ta’ konverżjoni li għalih huwa msejjaħ kull bniedem (ara MV 14); (iv) l-atteġġjament tal-konfessuri waqt iċ-ċelebrazzjoni tal-Qrar meta huma msejħin biex f’isem Alla jilqgħu lil kull midneb niedem (ara MV 17); (v) l-għoti tal-indulġenza f’rabta mal-Ġublew, li apparti mit-tneħħija tal-effetti negattivi fina tad-dnubiet li diġà nħafrulna, iddewwaqna l-vera tifsira tal-kelma, għax il-ħniena ta’ Alla ssir l-indulġenza tiegħu (mill-abbundanza infinita ta’ mħabbtu għalina) li permezz tal-Knisja tilħaq kull midneb maħfur u tgħinu jġib ruħu bl-imħabba, u mhux jerġa’ jaqa’ fid-dnub (ara MV 22).
Papa Franġisku jagħmel emfasi fuq l-opri tal-ħniena, kemm dawk li jmissu r-ruħ, kif ukoll dawk li jmissu l-ġisem. Hawn tidħol ir-responsabbiltà ta’ kull Nisrani lejn ħutu l-bnedmin, l-aktar dawk li jinsabu – kif iħobb isemmi l-Papa – fil-periferiji eżistenzjali tas-soċjetà tallum.
Il-Papa ma jonqosx li jagħmel tliet referenzi sbieħ għal siltiet mill-Maġisteru ta’ xi predeċessuri riċenti tiegħu, u li jkompli jitfgħu dawl fuq l-għanijiet tal-Ġublew tal-Ħniena:
I. Id-diskors profetiku tal-Papa San Ġwanni XXIII fil-ftuħ tal-Konċilju Vatikan II (Ottubru 1962), fejn dan jisħaq fuq Knisja li “tippreferi tuża d-duwa tal-ħniena flok taqbad l-armi tas-severità ħarxa” u li “turi ruħha bħala omm mimlija mħabba għal kulħadd” (MV 4).
II. Id-diskors programmatiku tal-Papa Beatu Pawlu VI fl-għeluq tal-Konċilju (Diċembru 1965), meta jgħid li l-Knisja li għamlet esperjenza ekkleżjali hekk qawwija u li għandha patrimonju teoloġiku għani għandha din id-direzzjoni: “li naqdu lill-bniedem … f’kull qagħda tiegħu, f’kull dgħjufija tiegħu, f’kull ħtieġa tiegħu” (MV 4).
III. L-Enċiklika tal-Papa San Ġwanni Pawlu II dwar il-ħniena ta’ Alla, Dives in Misericordia (Novembru 1980): “Il-misteru ta’ Kristu … iġegħelni wkoll inxandar li l-ħniena hi l-imħabba kollha ħniena ta’ Alla … Iġegħelni wkoll nirrikorri għal din il-ħniena u nitlob għaliha f’dan il-mument hekk iebes u hekk kritiku tal-ġrajja tal-Knisja u tad-dinja” (MV 11).
Fatt interessanti li l-Papa ħass li kellu jinkludi fid-dokument Misericordiae Vultus huwa l-aspett interreliġjuż meta jispjega kif il-ħniena hija valur importanti lil hinn mill-ħitan tal-Knisja, għax insibuha fil-Ġudaiżmu u fl-Iżlam (ara MV 23).
Ejjew inħallu l-Papa Franġisku jkellimna hu direttament fil-Konklużjoni tad-dokument tiegħu, Misericordiae Vultus, para. 25: “Għalhekk din is-Sena Mqaddsa straordinarja, biex ngħixu fil-ħajja ta’ kuljum il-ħniena li sa minn dejjem il-Missier xerred fuqna. F’dan il-Ġublew ejjew inħallu lil Alla jissorprendina. Hu ma jegħja qatt jiftaħ beraħ il-bieb ta’ qalbu biex itennilna li jħobbna u jrid jaqsam ħajtu magħna. Il-Knisja tħoss b’mod qawwi l-urġenza li xxandar il-ħniena ta’ Alla. Il-ħajja tagħha tkun awtentika u kredibbli meta tagħmel mill-ħniena t-tħabbira konvinta tagħha. Hi taf li l-ewwel dmir tagħha, fuq kollox fi żmien bħalma hu dan tagħna, mimli b’tamiet kbar imma wkoll b’kuntrasti qawwija, hu dak li ddaħħal lil kulħadd fil-misteru kbir tal-ħniena ta’ Alla, hi u tikkontempla l-wiċċ ta’ Kristu
“Il-Knisja hi l-ewwel waħda li hi msejħa tkun xhud veritier tal-ħniena, billi tistqarrha u tgħixha bħala l-qalba tar-Rivelazzjoni ta’ Ġesù Kristu. Mill-qalb tat-Trinità, mill-ġewwieni l-aktar profond tal-misteru ta’ Alla, tnixxi bla waqfien ix-xmara kbira tal-ħniena. Din l-għajn ma tista’ qatt tinxef, ikunu kemm ikunu dawk li jersqu jixorbu minnha. Kull darba li xi ħadd jiġi bżonnha, jista’ jersaq lejha, għax il-ħniena ta’ Alla hi bla tarf. Daqskemm ma nistgħu qatt nifhmu l-fond tal-misteru li fih tinsab, daqshekk ieħor hu bla tarf l-għana li joħroġ minnha.
“F’din is-Sena tal-Ġublew, il-Knisja ssir eku tal-Kelma ta’ Alla li tidwi qawwija u konvinċenti bħala kelma u ġest ta’ maħfra, ta’ tweżin, ta’ għajnuna, ta’ mħabba. Ma tegħja qatt toffri l-ħniena u tistabar dejjem fil-faraġ u l-maħfra li xxerred. Il-Knisja ssir leħen għal kull raġel u mara u ttenni b’fiduċja u bla waqfien: ‘Ftakar fil-ħniena u t-tjieba tiegħek, għax huma minn dejjem, Mulej’ (Salm 25:6)”.
Dun Hector Scerri
Sena Kateketika 2015 – 2016
Sena Kateketika
Ottubru 2015 – Ġunju 2016
Il-ġenituri tat-tfal li ser jitħejjew għal-Ewwel Tqarbina (tfal tal-year 2) iridu jiktbu lil uliedhom għall-klassi tal-katekiżmu billi jiġu l-uffiċċju parrokkjali. Iridu jġibu magħhom kopja taċ-ċertifikat tal-magħmudija ta’ wliedhom.
It-Tnejn 5 t’Ottubru 2015: Jibda t-tagħlim għat-tfal kollha.
Il-Ħamis 15 t’Ottubru 2015: Fis-6.00p.m. ikollna Quddiesa għat-tfal kollha tal-klassijiet tal-katekiżmu u wara noħorġu purċissjoni bl-istatwa tal-Madonna tar-Rużarju.
Ġranet u ħinijiet tal-klassijiet tal-katekiżmu:
Bniet ta’ year 2: It-Tnejn u l-Ħamis mill-4.30 sal-5.15 p.m.
Bniet ta’ year 3 u 4: It-Tlieta u l-Ħamis mill-4.30 sal-5.15 p.m.
Bniet ta’ year 5 u 6: It-Tnejn u l-Ġimgħa mill-4.30 sal-5.15 p.m.
Bniet ta’ form 1: It-Tlieta u l-Ħamis mill-4.30 sal-5.15 p.m.
Bniet tal-Griżma (form 2): It-Tlieta u l-Ħamis mill-5.15 sas-6.00 p.m.
Subien ta’ year 2 u 3: It-Tnejn u l-Ġimgħa mill-4.30 sal-5.15 p.m.
Subien ta’ year 4: It-Tnejn u l-Ħamis mill-4.30 sal-5.15 p.m.
Subien ta’ year 5: It-Tnejn u l-Ġimgħa mill-4.30 sal-5.15 p.m.
Subien ta’ year 6 u form 1: It-Tnejn u l-Ħamis mill-5.30 sas-6.15 p.m.
Subien tal-Griżma (form2): It-Tnejn u l-Ħamis mill-4.30 sal-5.15p.m.
Talba tal-Papa Franġisku għal din l-art tagħna fi tmiem l-Ittra Enċiklika Laudato Si’
Mulej l-aktar għoli, li tinsab fl-univers kollu
u fl-iċken waħda mill-ħlejjaq tiegħek,
Int li ddawwar bi ħlewwietek kulma jeżisti,
sawwab fuqna l-qawwa ta’ mħabbtek
biex nistgħu nieħdu ħsieb tal-ħajja u tal-ġmiel.
Kattar fina l-paċi, biex ngħixu bħal aħwa
bla ma nweġġgħu lil ħadd.
Missier il-foqra, għinna nifdu lill-imwarrbin
u l-minsijin ta’ din l-art li jiswew tant f’għajnejk.
Fejqilna ħajjitna, biex inħarsu d-dinja u mhux inħarbtuha,
biex niżirgħu l-ġmiel u mhux it-tinġis u l-qerda.
Miss il-qlub ta’ dawk li jfittxu biss kif sa jgawdu huma
minn fuq dahar il-foqra u l-art.
Għallimna niskopru l-valur ta’ kull ħaġa,
nikkontemplaw b’għaġeb,
nagħrfu li aħna tabilħaqq magħqudin mal-ħlejjaq kollha
fil-mixja tagħna lejn id-dawl tiegħek bla tarf.
Irroddulek ħajr li ta’ kuljum tinsab magħna.
Weżinna, nitolbuk, aħna u nitqabdu
għall-ġustizzja, l-imħabba u l-paċi.
Talba tal-Papa Franġisku għall-Ġublew tal-Ħniena (Diċembru 2015 – Novembru 2016)
Mulej Ġesù Kristu,
int li għallimtna nħennu bħalma ħanin hu Missierna tas-Sema,
u għidtilna li min jara lilek jara lilu:
urina wiċċek u nkunu salvi.
Ħarstek mimlija mħabba ħelset lil Żakkew u ’l Mattew mill-jasar tal-flus;
lill-adultera u l-Maddalena milli jqiegħdu l-ferħ tagħhom biss fi ħlejqa;
bikkiet lil Pietru wara t-tradiment,
u wiegħdet il-Ġenna lill-ħalliel niedem.
Agħmel li kull wieħed u waħda minna jisma’ tingħad lilu
dik il-kelma li int lissint lis-Samaritana:
Kieku kont taf id-don ta’ Alla!
Int il-wiċċ li jidher tal-Missier li ma jidhirx,
ta’ Alla li juri s-setgħa tiegħu fuq kollox bil-maħfra u l-ħniena:
agħmel li l-Knisja tkun fid-dinja l-wiċċ tiegħek li jidher,
int li int il-Mulej tagħha, rebbieħ fuq il-mewt u glorjuż.
Int ridt li l-ministri tiegħek ikunu huma wkoll imlibbsa bid-dgħufija
biex jistgħu jħossu għal dawk li qegħdin fl-injoranza u l-iżball;
agħmel li kull min jersaq lejn wieħed minnhom
iħossu milqugħ, maħbub u maħfur minn Alla.
Ibgħat l-Ispirtu tiegħek u kkonsagrana lkoll bid-dilka tiegħu
biex dan il-Ġublew tal-Ħniena jkun sena ta’ grazzja tal-Mulej
u l-Knisja tiegħu b’ħeġġa mġedda tista’ twassal lill-foqra l-bxara t-tajba,
tħabbar il-ħelsien lill-imjassrin u l-maħqurin, u d-dawl mill-ġdid lill-għomja.
Dan nitolbuhulek bl-interċessjoni ta’ Marija, Omm il-Ħniena,
int li tgħix u ssaltan flimkien mal-Missier u mal-Ispirtu s-Santu
għal dejjem ta’ dejjem.
Ammen.
Lulju 2015
Beda s-sajf u s-sħana bdiet ukoll. F’dawn il-jiem, s-sħana qisu taqtgħalna qalbna aktar malajr mis-soltu. Fis-sajf irridu “break”. Dan il-“break”, xi kultant, neħduh anke fil-prattika tal-ħajja nisranija tagħna. Jista’ jiġri li fis-sajf nintelqu anke fl-affarijiet ta’ Alla.
Fis-sajf, xi wħud ma jattendux għall-Quddiesa tal-Ħadd għax jgħidu li ma jifilħux għas-sħana li jkun hemm fil-knisja. Xi wħud oħrajn, is-Sibt filgħaxija jibqgħu barra sa tard bil-lejl u l-għada jqumu tard u ma jkollhomx ħin għal Quddiesa.
Fis-sajf, ħafna minna jkollna żmien ta’ vaganzi: insiefru jew immorru f’xi post ħdejn il-baħar biex ninsew ftit ix-xogħol u l-impenji l-oħra. Dan huwa tajjeb; imma xi wħud, fi żmien il-vaganzi, jinsew anke lil Alla.
Għalina l-insara, il-Quddiesa tal-Ħadd tibqa’ dejjem laqgħa importanti ħafna: il-laqgħa tagħna ma’ Ġesu u ma’ xulxin. Il-Quddiesa tal-Ħadd hija l-laqgħa tagħna lkoll li nemmnu f’Ġesu biex niċċelebraw il-qawmien ta’ Ġesu mill-mewt u l-ħajja ġdida li tana Ġesu. Dan nagħmluh permezz tas-smigħ tal-Kelma ta’ Alla u bit-Tqarbin.
Għal ħafna minna, il-Quddiesa tal-Ħadd hija l-uniku kuntatt mal-Kelma ta’ Alla u mal-Ewkaristija. Meta xi ħadd ma jattendix għall-quddiesa tal-Ħadd għal darba, tnejn jew iżjed, ikunu għaddew ġimgħat sħaħ mingħajr kuntatt ma’ Ġesu preżenti fil-Kelma tiegħu u fl-Ewkaristija.
Hija ħasra li, filwaqt li Ġesu jħobbna ħafna, aħna nwarrbuh mal-iċken diffikulta li niltaqgħu magħha jew insibu ħafna skużi biex ma mmorrux għall-Quddiesa. Hija ħasra li fi tmiem is-sajf tisma’ tfal jgħidulek li matul is-sajf ma jkunu ġew qatt il-knisja.
Ejjew ma nħallux is-sajf ibegħedna minn Ġesu. Nappella lill-ġenituri kollha biex, matul is-sajf, mhux biss huma jattendu għall-Quddiesa tal-Ħadd, imma jaraw ukoll li wliedhom tfal u żgħażagħ jibqgħu qrib ta’ Ġesu permezz tal-quddiesa.
Il-ġenituri għandhom iħajru lil uliedhom, li fis-sajf ma jkollhomx skola u studju, anke għall-Quddiesa ta’ kuljum. Il-Quddiesa ta’ kuljum tagħti sens ġdid lill-ħajja tagħna.
Fr Lino
Imsiebaħ – 2015 – 7 – Lulju
[spiderpowa-pdf src=”https://birkirkara-sm.knisja.mt/wp-content/uploads/2015/06/Imsiebah-Lulju-2015.pdf”]